கோச்சடையான் - சித்திரமும், சரித்திரமும்!

'ஹாலிவுட் படங்களுக்கு நிகரான', 'அவதார் படத்துக்கு இணையான' என்று எக்கசக்க பில்ட்-அப் கொடுத்த பின்னர், அதற்கு எதிர்மாறான ட்ரைலரை தைரியமாக ரிலீஸ் செய்தது இந்தப் படத்திற்கு சாதகமாக அமைந்து விட்டது! எனது எதிர்பார்ப்பை குறைக்க உதவி, படத்தை ரசிக்க வைத்தது அந்த  ட்ரைலர் தான்!

கோச்சடையானில் வரும், அரண்மனை, ஆடை அணிகலன்கள், கட்டிடங்கள், கப்பல்கள், ரதம் போன்ற உயிரற்ற பொருட்கள், உயிரோட்டத்துடன் தத்ரூபமாக இருக்கின்றன - இதற்காகவே இப்படத்தைப் பார்க்கலாம்! ஆனால், உயிருள்ள ஜீவன்கள் தான் உயிரற்று பரிதாபமாக நடமாடுகின்றன! பெரிதும் விளம்பரப் படுத்தப் பட்ட மோஷன் கேப்ச்சர், பார்வையாளர்களின் ஏமாற்றத்தை மட்டுமே கேப்ச்சர் செய்திருக்கிறது. மனதில் ஒட்டாத பாடல்களுக்கு (ஏ.ஆர்.ரஹ்மான்?!) செலவழித்த நேரத்தையும், பணத்தையும் மற்ற காட்சிகளை மேம்படுத்துவதில் பயன்படுத்தி இருக்கலாம்; சண்டைக் காட்சிகளை படமாக்கிய விதம் மட்டும் ஆறுதல் தருகிறது!

சூப்பர் ஸ்டாரின் வசீகரமான குரல், தீபிகாவை விட இளமையான ரஜினி,  படுகோனேவின் படு இறுக்கமான உடைகள், அனிமேஷனுக்கு பின்னே ஒளிந்திருக்கும் நடிகர்களின் முகங்களையும், குரல்களையும் தேடுவது போன்ற சிறுசிறு சுவாரசியங்களைத் தாண்டியும் இப்படத்தில் ரசிப்பதற்கு ஒரு முக்கியமான அம்சம் இருக்கிறது; கோச்சடையான், ஒரு விறுவிறுப்பான வரலாற்றுக் கதை என்பதே அது!

தவிர்க்க இயலா ஒரு சூழ்நிலையில், எதிரி தேசமான கலிங்கபுரியிடம், தனது படைகளை ஒப்படைத்து விட்டு நாடு திரும்புகிறான் கோட்டைப் பட்டினத்தின் வீரத்தளபதி கோச்சடையான் (ரஜினி 1)! அதையே சாக்காக வைத்து, அவன் மீது தேசத் துரோக பட்டம் சுமத்தி, சிரச்சேதம் செய்கிறான் பொறாமை கொண்ட கோட்டைப் பட்டினத்து மன்னன் (நாசர்)! தன் தந்தை மீதான அவப் பெயரைத் துடைக்க, கோச்சடையானின் மகன் ராணா (ரஜினி 2) எடுத்துக் கொள்ளும் முயற்சிகள் தான் படத்தின் கதை!

எத்தனை காலம் ஆகி விட்டது, இப்படி ஒரு முழுநீள வரலாற்றுப் படத்தைப் பார்த்து! இம்சை அரசன் 23ம் புலிகேசி, பொன்னர் சங்கர், தெனாலி ராமன் ஆகிய சில வரலாற்றுப் படங்கள் சமீபத்தில் வந்திருந்தாலும், அவற்றின் திரைக்கதை இந்த அளவு விறுவிறுப்பாக இல்லை என்பதே உண்மை! கே.எஸ்.ரவிக்குமார் எழுதியிருக்கும் இக்கதை வழக்கமான ஒன்று தான்; லாஜிக் ஓட்டைகளுடன் கூடியது தான்! ஆனால், அதை சொல்லியிருக்கும் விதமே இப்படத்தைத் தூக்கி நிறுத்தியிருக்கிறது! எதிர்பார்ப்புக்களை இறக்கி வைத்து விட்டு சென்றால், ஏமாறாமல் திரும்பி வரலாம்!

பெரும்பாலான ஹாலிவுட் அனிமேஷன் மற்றும் சூப்பர் ஹீரோ படங்கள் வெளியாவதற்கு முன்னரும், பின்னரும் அவற்றின் காமிக்ஸ் வடிவங்களை வெளியிட்டு அதிலும் கொஞ்சம் பணம் பார்ப்பார்கள்! கோச்சடையானின் இறுதிக் காட்சியில் இரண்டாம் பாகத்திற்கு அடி போட்டிருக்கிறார்கள். ஒருவேளை இப்படம் கமர்ஷியல் வெற்றியைச் சந்திக்கா விட்டால், இதன் இரண்டாம் பாகம் வராமலேயே போய் விடலாம்!

ஆனால், இதன் தொடர்ச்சியை காமிக்ஸ் வடிவத்தில் வெளியிட்டால் - அதிக பொருட்செலவும் இருக்காது, ஒரு புதிய வடிவத்தின் மூலம் மக்களை சென்றடைந்தது போலவும் இருக்கும்! குறைந்த பட்சம், இப்போது வெளியாகி இருக்கும் முதல் பாகத்தை, காமிக்ஸ் வடிவில் வெளியிட்டு அதன் வரவேற்பு எப்படி இருக்கிறது என்று ஆழம் பார்க்கலாமே?!

பின்குறிப்பு: தமிழில் வெளிவந்த முதல் அனிமேஷன் படம், வந்த சுவடே தெரியாமல் சென்ற "இனிமே நாங்க தான்"; இதன் ட்ரைலர் சில வருடங்களுக்கு முன்னர் டிவி சானல்களில் வந்தது - படம் பரவலாக வெளியானதா என்று தெரியவில்லை! இந்தியாவில் தயாரிக்கப் பட்ட முழுநீள அனிமேஷன் திரைப்படங்களில், தமிழ்நாட்டின் பங்கு அதிகம் இருக்கிறது என்பது விக்கிபீடியாவை பார்க்கும் போது தெரிகிறது!

 

***

 முந்தைய பதிவு: லூசியா - கனவுகளின் காதலன்!