முகமூடி - தமிழ் காமிக்ஸ் மறுமலர்ச்சிக்கு மிஷ்கின் செய்த பேருதவி!

முகமூடி நான் பார்க்க விரும்பிய படம்! மேலோட்டமாக விமர்சனங்களை மேய்ந்ததில் எனக்கு தெரிய வந்தது - இது ஒரு பார்க்கக் கூடாத படம்! அது தெரிந்தவுடன் அனைத்து விமர்சனங்களையும் வரி விடாமல் படித்தேன்! படித்ததும் இது பார்த்தே தீர வேண்டிய படம் என்ற முடிவுக்கு வந்தேன்! ஏன்? விஜய டி ராஜேந்தரின் வீராசாமி, விக்ரமின் கந்தசாமி போன்ற மரண மொக்கை படங்களை டிவியில் போடும்போதெல்லாம் ஒரு காமெடி எஃபெக்ட்டுக்காக கொஞ்ச நேரமாவது பார்ப்பதில்லையா? அதே காரணம்தான்! இவ்வாண்டில் வெளியான சூப்பர் unintentional காமெடிப் படம் இதுவாகத்தான் இருக்க முடியும். இது போதாது என்று உச்சகட்ட காமெடியாக, 'இது தமிழின் முதல் சூப்பர் ஹீரோ படம்' என்று வேறு சொல்லிக் கொள்கிறார்கள்! :) படத்தில் சில சண்டை காட்சிகளும், அவற்றிக்கான பின்னணி இசையும் அவ்வபோது ட்ராஜிக் ரிலீஃப் ஆக வருகின்றன, நிஜமாகவே பாராட்டுகள்!

மிக்க நன்றி மிஷ்கின் சார்! நீங்கள் பத்திரிக்கை பேட்டிகளில் சொல்லியிருந்ததைப் போல, தமிழ் காமிக்ஸ் இதழ்களின் பெயர்களையோ அல்லது அதில் தோன்றிய நாயகர்களின் பெயர்களையோ முகமூடி படத்தில் எந்த ஒரு கதாபாத்திரம் மூலமாகவும் சொல்ல வைக்கவில்லை! ஜீவா, நரேனிடம் 'இரும்புக்கை மாயாவி தெரியுமா?' என்று விறைப்பாக நின்று கொண்டு குரல் உயர்த்திக் கேட்கவில்லை! புத்தர் சிலைக்கு அடியில் முத்து காமிக்ஸ் இதழ்கள் சில சிதறிக் கிடப்பது போன்ற கவிதையான காட்சியை வயலினின் அழுகையினூடே செதுக்கவில்லை! முக்கியமாக, முகமூடி ஜீவா - டாஸ்மாக்கில் லயன் காமிக்ஸ் படிப்பது போன்றதொரு காட்சியையும் வைத்துத் தொலைக்கவில்லை! இதன் மூலம் சமீபத்தில் ஏற்பட்டிருக்கும் (தமிழ்) காமிக்ஸ் மறுமலர்ச்சிக்கு உங்களால் ஆன மிகப் பெரியதொரு உதவியை செய்திருக்கிறீர்கள்! இனி நீங்கள் கொடுக்கப்போகும் பேட்டிகளில் தமிழ் காமிக்ஸ்களில் வெளியான சூப்பர் ஹீரோ கதைகளுக்கும், முகமூடி படத்தில் 'இல்லாத' கதைக்கும் எந்த ஒரு தொடர்பும் இல்லை என்பதை தெளிவுபடுத்தி விட்டீர்களானால் இன்னும் சிறப்பாக இருக்கும்.

கிளைமாக்ஸ் காட்சிக்கு பொருத்தமான மாற்று வசனம் இதோ:
நரேன்: பேட்மேன், ஸ்பைடர்மேன், சூப்பர்மேன், அயன்மேன்...  ஏய் முகமூடி, ஒன் பேரு இன்னா மேன்?!
ஜீவா: ஐ'ம் மொக்கைமேன்!

மிஷ்கினின் பேட்டிகளில் இருந்து!
- குமுதம் - 25.4.2012
எதன் தாக்கத்தில் இந்தப் படத்தை எடுக்குறீங்க?
சொன்னால் சிரிப்பீங்க. என்னோட இளமைக் காலம் முழுதும் என்னை வழி நடத்தியது, ராணி காமிக்ஸ், முத்து காமிக்ஸ், லயன் காமிக்ஸ் புத்தகங்கள்தான். சினிமாவிற்கு வந்த பிறகு இதை எப்படியாவது படமாக்கணும்னு காத்திருந்தேன். இப்பதான் டைம் வந்திருக்கு.

- ஆனந்த விகடன் - 25.4.2012
'முகமூடி' - என் சின்ன வயசுக் கனவு. 'அம்புலிமாமா', 'பாலமித்ரா', 'முத்து காமிக்ஸ்' படிச்சு வளர்ந்தவன் நான். இரும்புக்கை மாயாவி இப்பவும் என் கனவில் வர்றான்! 'முகமூடி' ஸ்க்ரிப்ட் முடிஞ்சதும் நான் நினைச்சது வந்ததை உணர்ந்தேன். இப்போதைய தமிழ் சினிமா சூழலில் சூப்பர் ஹீரோ படம் எடுப்பது கஷ்டம். கண்ணு முன்னாடி ஒரு கொடுமை நடந்துட்டு இருக்கு. அதை எதிர் கொள்ள நினைக்கிறவன் என்ன மாதிரி நடந்துக்குவான்னு யோசிச்சுப்பார்த்தேன்... ஒரு ஸ்பைடர்மேன், சூப்பர்மேன், இரும்புக்கை மாயாவி மாதிரி எதாச்சும் சாகசம் பண்ணாத்தான் உண்டு. அதுதான் இந்தப் படத்துக்கான விதை.