மழுங்கிய மனிதர்கள் - 2 - சாலையில் ஒரு சாகசம்!

வீட்டிலிருந்து எனது அலுவலகம் கிட்டத்தட்ட 12KM தொலைவு! இந்த சொற்ப தொலைவைக் கடக்க பெங்களூரின் பயங்கர டிராஃபிக்கில் குறைந்தது 45 நிமிடங்கள் ஆகும். அதுவும் வீட்டிலிருந்து சரியாக காலை 9 மணிக்கோ அல்லது ஆபீசில் இருந்து மாலை 6 மணிக்கோ கிளம்பினால் நிச்சயம் ஒருமணிநேரம் ஆகி விடும். மந்தமாக ஓடிக்கொண்டிருக்கும் என் வாழ்வில் சில சாகசங்கள் செய்வதற்கான வாய்ப்பை அளிப்பது இந்த பெங்களூர் நகர காலை, மாலை - சாலைப் பயணங்கள்தான்! தினம் தினம் நான் சந்திக்கும் சுவாரசியமான(!) சக பயணர்களின் சில எரிச்சலூட்டும் சாகசங்கள் இதோ:

• வீட்டருகில் உள்ள குறுகல் சாலைகளில் NFS விளையாடும் காரோட்டிகள்!
• 90 டிகிரி குறுக்குச் சந்தில், 120 டிகிரியில் மெதுவாய் திரும்பும் ஆக்டிவா அழகிகள்(!)
• ஹார்ன் அடிக்காமல் திடுமென சந்திலிருந்து உதிக்கும் பைக்குகள்
• டெப்போ அருகில் இடைஞ்சலாய் நிற்கும்  BMTC பஸ்கள்
• சிக்னலருகில் வைட்கலர் பல்சார் மேல் சாய்ந்தவாறு ஹெல்மெட் மாட்டாமல் எவன் சிக்குவான் என அலைபாயும் கண்கள்
• இடது லேனில் வந்து சட்டென சிக்னலின் வலப்புறம் திரும்பி திணறடிக்கும் கார்கள்
• ஸ்கூட்டரில் ஸ்கூல் வேன் சர்வீஸ் நடத்தும் குடும்பக் கட்டுப்பாடில்லாத அங்கிள்கள்
• இன்டிகேட்டர் போடாமல் இடதில் திரும்பும் இன்டிகாக்கள்
• மனதுக்குள்ளேயே இன்டிகேட்டர் போட்டு சட்டென்று திரும்பும் ஆட்டோக்கள்
• இன்டிகேட்டர் போட்டுக்கொண்டே நேராய் செல்லும் கம்பெனி கேப்கள்
• ஹெவி ட்ராஃபிக்கில் U-டர்ன் போடும் கால் டாக்ஸிக்கள்
  
• வேகமாய் செல்வதற்காக ஆம்புலன்ஸ் வண்டியை துரத்தும் இரக்கமில்லாதவர்கள்
• ராங் சைடில் வந்து ட்ராஃபிக் ஜாம் செய்யும் வண்டிகள்
• நெரிசலான ட்ராஃபிக்கில் மணிக்கு 90KM வேகத்தில் வண்டி ஓட்டும் வானரங்கள்
• அப்படி ஓட்டியும் சிக்னலில் சிக்கிக் கொண்டு ஹெல்மெட் சொரியும் அசடுகள்
• சிகரெட்டுடன் வண்டி ஓட்டி, தீர்ந்ததும் பின்னால் எறியும் தீவட்டி தடியர்கள்
• விடாமல் ஹார்ன் அடித்து BP ஏற்றும் SUV-க்கள்
• பின்புறம் பாப்பா படம் ஒட்டிக்கொண்டு, பப்பர பப்பர ஹார்ன் அடிக்கும் பிரைவேட் பஸ்கள்
• அதன் புட்போர்டில் தொங்கியவாறு தேவையில்லாமல் விசிலடித்து, கையாட்டும் கண்டக்டர்கள்
• பஸ் ஜன்னல் சீட்டில் உட்கார்ந்துகொண்டு ரோட்டில் வெற்றிலை அபிஷேகம் செய்யும் பெரிசுகள்
• ரூல்ஸ் பின்பற்றுகிறேன் பேர்வழி என்று நீளமாக கை நீட்டி சிக்னல் காட்டும் தாத்தாக்கள்
• யார் கை காட்டினாலும் சடன் பிரேக் போடும் ஆட்டோக்கள்
• துப்பட்டா சக்கரத்தில் சிக்கிடுமோ என பதற வைக்கும் ஸ்கூட்டி சிட்டுகள்
• ஆடை பறக்க வண்டி ஓட்டி ஆக்சிடென்ட்டுக்கு வழிவகுக்கும் அழகிய பெண்கள்
• கழுத்துக்கும் தோள்பட்டைக்கும் இடையில் சொருகிய மொபைலில் மொக்கை போடும் காலேஜ் பசங்கள்
• பீக் அவரில் கார் ஓட்டக் கற்றுக்கொள்ளும் டிரைவிங் ஸ்கூல் கத்துக்குட்டிகள்
• காரில் அமர்ந்தவாறே சாலையோர கடையில் சாத்துக்குடி வாங்கும் சாத்தப்பன்கள்
• பின்னால் வருபவர்கள் பற்றிய கவலையின்றி கார் கதவை படார் என திறக்கும் ஆன்ட்டிகள்
• சைலன்சர் கழட்டிய RX100 ஓட்டி காதை கிழிக்கும் யமஹா யமன்கள்
• இலவசமாய் கொசு விரட்டும் புகை கசியும் ஆட்டோக்கள்
• TMT கம்பிகளை ஈட்டி போல் அடுக்கி கொண்டு சடன் பிரேக் போடும் கொலைகார லோட் லாரிகள்
• கண்ணில் மண்ணைத் தூவும் மணல் லாரிகள், ரோட்டில் குப்பை போடும் குப்பை லாரிகள்
• அதை கழுவிக்கொண்டே சென்று பின்னால் வருபவர்களை வழுக்க வைக்கும் தண்ணீர் லாரிகள்

கடைசியாக, இவர்களை எல்லாம் சகித்துக்கொண்டு, கீழ்க்கண்ட சாத்வீக சாகசங்கள் செய்தவாறே வாழ்க்கை வண்டியை ஓட்டிக்கொண்டிருக்கும் ப்ளேட்பீடியா ஓனர் (ஒனர்னா ஓரத்துல ஒக்காரவேண்டியதுதானே!):

• மேற்கண்டவாறு எரிச்சலூட்டுபவர்களை - பைக்கில் சென்றால் மனதிலும், காரில் கண்ணாடி ஏற்றி சென்றால் வாய் விட்டும் கெட்ட வார்த்தையில் திட்டுவது ;)
  
• ஆக்ஸிலேட்டரை தீவிரமாய் திருகி பைக்கை உறுமச் செய்தும், ஹார்ன் அடித்தும் எதிர்ப்பை காட்டுவது!
• தலையை இடதும் வலதுமாக ஆட்டி ஆட்டி எரிச்சலை வெளிப்படுத்துவது!
  
• மொபைலில் பேசிக்கொண்டே வண்டி ஓட்டுபவர்களின் பின்னால் விடாமல் ஹார்ன் அடிப்பது!
• ஹார்ன் அடித்து அலம்பு பண்ணும் SUV-களுக்கு ரியர் வியூ மிர்ரரில் டெர்ரர் லுக் குடுப்பது!
  
• ஹைஸ்பீடில் வரும் பைக்குகளுக்கு வழிவிடாமல் மந்தமாய் வண்டி ஓட்டுவது ;)
  
• வழிவிடாமல் வண்டி ஓட்டுபவர்களை ஓவர்டேக் செய்து அவர்களுக்கு வழிவிடாமல் கடுப்பேற்றுவது :D
  
• சிக்னல் மஞ்சளுக்கு மாறும் போதே பொறுப்பாக நின்று பின்னால் வருபவர்களை வெறுப்பேற்றுவது!
• ராங் சைடில் வரும் வண்டிகளை இடிப்பது போல் நேராக செல்வது!
• இன்சூரன்ஸ் எக்ஸ்பைர் ஆகியிருந்தாலும் பதட்டப்படமால் வைட் கலர் பல்சார் அருகேயே சிக்னலில் வண்டியை நிப்பாட்டுவது ;)
• வொர்க் ஃப்ரம் ஹோம் சலுகையை அடிக்கடி உபயோகித்துக்கொண்டு வீட்டு வேலை பார்ப்பது! :) :) :)